Informe Aladino 2019

O Estudo de Alimentación, Actividade física, Desenvolvemento Infantil e Obesidade en España (ALADINO 2019) é un estudo descritivo transversal das medidas antropométricas obtidas por medición directa e de factores asociados obtidos mediante cuestionarios nunha mostra aleatoria de 16.665 escolares de 276 Centros de Educación Primaria, representativa da poboación escolar de 6 a 9 anos residente en España. O traballo de campo realizouse entre outubro e decembro de 2019 nas 17 Comunidades Autónomas e 2 Cidades Autónomas do territorio nacional. 
Ademais, o estudo ALADINO 2019 forma parte da quinta onda da iniciativa COSI EURO OMS para a vixilancia harmonizada da obesidade infantil na rexión europea da OMS.
De acordo cos resultados, obsérvase unha tendencia descendente do exceso de peso desde 2011 e estabilización respecto de 2015, aínda que a prevalencia de sobrepeso e obesidade dos escolares de 6 a 9 anos en España segue sendo elevada.
De entre os factores asociados á obesidade, seguen destacando os relacionados cos hábitos de alimentación e coa falta de actividade física, como o baixo consumo de froitas e hortalizas ou o uso excesivo de pantallas. Tamén segue existindo unha brecha importante na situación ponderal dos escolares dependendo do nivel de ingresos económicos da familia e o nivel educativo dos proxenitores.